Maiatzeko lehen zatian euria eta tenperatura baxuak izan dira nagusi, baina, bigarren hamabostaldian termometroak gora egingo du eta giro lehorragoa izango da protagonista. Datozen egunetarako, 30 graduak gainditzeko moduko maximoak iragarri dituzte.
Prezipitazioak eta urtegiak
Lehen hamabostaldian eguraldi kaxkarrak hartu du protagonismoa. Euria etengabea izan da hainbat egunetan, eta apirilaren 27tik aste honen hasiera arte apenas izan da atsedenik: 23 egunetik bostetan bakarrik ez da prezipitaziorik neurtu. Hilabeteko egunik euritsuena maiatzaren 15a izan zen: Urkulun metro karratuko 25,7 litro pilatu ziren eta Aixolan, 14,9.
Horren harira, bailarako urtegien betetze-mailari dagokionez, goraino mantentzen dira: Elgetako Aixola urtegia %100,07an dago eta Aretxabaletako Urkulu, berriz, %99,92an. Otsailean izan zuten bi urtegiek momenturik baxuena –normaltasunaren barruan–; ordutik hona, goraino daude.
Tenperaturak, gora
Tenperaturek ere udaberri fresko baten irudia utzi dute maiatzeko lehen zatian. AEMETeko datuen arabera, egunik hotzena maiatzaren 11 izan zen Debagoienean, 6 gradu inguruko minimoekin. Bestalde, orain arte maiatzeko batez besteko tenperatura 13 gradu ingurukoa izan da. Dena den, azken egunetako iragarpenek agerian uzten dute maiatzak norabide aldaketa ekarri duela bigarren hamabostaldian. Udaberri heze eta fresko bati uda usaina hartzen hasi zaiola dirudi Debagoienean.