Atzo jokatu zen Tolosako Bonberenea aretoan Gipuzkoako Herriarteko Bertsolari Txapelketaren azken finalaurreko saioa. Bertan, Goierriko Zumarraga-Urretxu 1 eta Bidasoako Txingudi 1 taldeak izan ziren aurrez aurre. Manex Mantxolak, Mikel Iturriotzek eta Antton Fernandez bertsolariek, Leire Akizu gai-jartzaileak eta Jon Mendizabal epaileak osatzen dute Zumarraga-Urretxu 1 taldea. Txingudi 1 taldea berriz; Manu Goiogana, Igauri Lopetegi eta Jon Luzuriaga bertsolariek, Jon Cia gai-jartzaileak eta Aitor Errazkin epaileak.
50 pertsona inguru elkartu ziren finalerako txartela nork eskuratuko zuen jakiteko asmoz, eta saio arin eta eder baten ostean, Goierriko taldea nagusitu zen. Horrenbestez, Leintz taldeak Zumarraga-Urretxu 1 izango du aurkari maiatzaren 30ean Aiako probalekuan jokatuko den finalean. Sarrerak bertsosarrerak.eus atarian eskuratu daitezke.
57tik bi talderako bidea
Urtarrilean iragarri zuen bertsozale elkarteak Gipuzkoa osoko 57 taldek eman zutela izena Gipuzkoako Herriarteko Bertsolari Txapelketaren edizio berri honetan. Debagoieneko bost taldek hartu zuten parte txapelketan: Leintz taldea (Arrasate-Eskoriatza), Mikaela Mentu (Oñati), Kale edo Bale (Antzuola), Txinpartaka (Oñati) eta Tutelatraku (Oñati).
Debagoieneko taldeak elkarren artean lehiatu ziren otsailetik martxora bitarte, eta Haizea Arana, Oihana Arana eta Ane Zuazubiskar bertsolariek, Olatz Zuazubiskar gai-jartzaileak eta Larraitz Trojaola epaileak osatutako Leintz taldea izan zen guztien artean onena. Debabarreneko irabazle zen Eibarko Xarmaginak taldearen aurka irabazi zuten hurrena, Soraluzeko herri antzokian. Debagoiendarrek Oñatin eskuratu zuten finalerako txartela, aurreko astean, Azpeitiko Zaharrak Berri taldeari aurrea hartuta.