Eskualdeko herri desberdinetatik igaro ondoren, aurten Bergarari egokitu zaio Debagoieneko Trikitixa Egunaren egoitza izatea. Datorren maiatzaren 30ean, herriko kaleak soinuz eta panderoz beteko dira egun osoko egitarau zabal batekin.
Eguneko protagonistak harrobiko ikasleak izango diren arren, maila handiko taldeak ere izango dira bertan. Egitarauari ekingo diote azokan, 11:00etan, ongi etorria emanez eta testigu aldaketa eginez. Ondoren, kalejirak eta emanaldiak egingo dira herriko gune ezberdinetan. 14:30ean herri bazkaria egingo dute Ikastolako karpan (eguraldi txarra badago, udal pilotalekuan), eta bazkalostea Altziri erromeriak girotuko du. Eguna borobiltzeko, kontzertuak izango dira Azokan: 19:00etan Xabi Solano, eta 23:00etan Iratzar erromeria.
