Soraluzeko herri Antzokian egin dute gaur arratsaldean, Gipuzkoako Herriarteko Bertso Txapelketaren baitan, Debagoiena eta Debabarrena eskualdeetako irabazleen arteko saioa. Debagoieneko ordezkaria Oihana Aranak, Haizea Aranak, Larraitz Trojaolak, Ane Zuazubiskarrek eta Olatz Zuazubiskarrek osatutako Leintz taldea izan da. Xarmaginak taldea izan dute bailarakoek aurrez aurre. 50 bertso-zale inguru batu dira saioa bertatik bertara jarraitzeko.
Behin egin beharreko denak eginda, debagoiendarrek 23 puntu lortu dituzte; Debabarrenekoek, aldiz, 23. Gauzak horrela, Leintz izango da maiatzaren 9an Oñatin jokoan egongo den finalaurrekoan oholtza gainera igoko dena. Azpeitiko Zaharrak Berri taldearekin arituko dira orduan finalerako txartela eskuratu nahian.
Finalaurrekorako "gogotsu"
"Balorazio positiboa egiten dugu; gustura abestu dugu eta giroa polita izan da", adierazi du Leintz taldekoen izenean Oihana Aranak gaurko saioaren ostean eta finalaurrekoari begira gogotsu daudela gaineratu: "Ilusioa egiten digu saioa Debagoienean izateak; uste dut dugu nolabait ere etxean aritzeko sentsazioa gure aldekoa izango dela. Saiatuko gara hor ere saio txukuna egiten.