Debagoienak dituen bi pilotari profesionalak elkartuko dira Aloña Mendi pilota sailak antolatu duen jaialdian: Ander Murua eta Beñat Rezusta.
B Serieko binakako txapelketa irabazi berritan (martxoaren 21ean lortu zuen txapela, Aritz Gabirondorekin bikote eginez), buruz burukoan dihardu Murua arrasatearrak. Txapelketa borobila egin ostean, binakakoa irabazi izanak "indarberritu" egin zuen pilotari arrasatearra. Final laurdenetan Beñat Senar izango du kontrario. Elkar ondo ezagutzen dute, Soraluzen taldekide izan ziren-eta.
Txapelketako partidu horren aurretik, eskuz binakako lagunartekoa jokatuko da, Salaberria-Rezusta eta Amiano-Iztueta bikoteekin. Pilotari bergararra ikusteko aukera izango dute zaleek. Rezusta ez dabil buruz buruko txapelketa jokatzen; eta eskuz binakako azken txapelketan asko sufritu zuen Etxeberriarekin. 2025ekoa Joseba Ezkurdiarekin irabazi ostean, aurtengoan bi partidu bakarrik irabazi ahal izan ditu ligaxkan.
Sarrerak salgai
Oñatiko jaialdirako sarrerak salgai daude hainbat lekutan: egubakoitzeko 23:00ak arte Arrano eta Aker tabernetan, eta zapatuan, partiduaren aurretik, frontoian. Baikoren webgunean ere eros daitezke. Batean zein bestean, 25 eurotan.