Apirilaren 5ean Gernikan Askatasunaren bidean, borrokak darrai! lelopean Aberri egunerako egitarau osatua antolatu du Jardun Koordinadorak: 13:00etan izango da manifestazioa eta ondoren bazkaria eta kontzertuak ere izango dira – Andoni Ollokiegi, Lee Kore, Arene 6, Odei, EH Sukarra eta Bad Sound System–.
Deialdia euskararen eta nazio auziaren inguruko testuinguruan kokatu du, Debagoieneko Jardun Koordinadorak. Izan ere, azken asteetan plazaratutako zenbait salaketaren harira, CCOO sindikatuaren jarduna seinalatu dute, laburki, “euskararen aurkako estrategia” bat egotziz. Horren harira, adierazi dute “pluraltasunaren eta elebitasunaren izenean, euskara langileriarentzat oztopo bezala jotzen” dela, eta kritikak jaso dituztenean “biktimismoan eta mehatxu judizialetan oinarritutako kanpaina mediatikoa” abiatu dutela.
Koordinadoratik nabarmendu dute "euskara eta bere erabilera zein berreuskalduntzea ez dela eskubide bat, Euskal Herria nazio gisa bizirauteko baldintza objektiboa baizik”. Halaber, ohartarazi dute “klase gatazkaren baitako nazio auziari begirako zapalketak dirauen bitartean, euskararen aldeko borrokak izaera politikoa” izango duela.
Hori dela eta, "Euskal Herriko langileei" dei egin diete Gernikan egingo den Aberri Egunean parte hartzera.