Konpromisotik aurrera eginez: kooperatiba gehiago, berdintasun gehiago leloa hautatu dute aurten Euskadiko Kooperatiben Goren
Kontseiluak eta Euskadiko Kooperatiben Konfederazioak Emakumeen Nazioarteko Eguna ospatzeko. Eta enpresa kooperatiboek aurrera egin dezaten emakumeen eguneroko esfortzua, dedikazioa eta inplikazioa aitortu gura izan dituzte. "Aurten, ikusgai dauden eta erraz identifikatu daitezkeen espazioetatik harago begiratu dugu. Badakigu emakume askok, ordezkaritza karguetan egon gabe, gure kooperatiben egunerokoan funtsezko zeregina betetzen dutela edo bete dutela", hala adierazi zuen Kooperatiben Kontseiluko idazkari nagusi teknikoak, Belen Balerdik Gasteizen egindako aitortza ekitaldian.
Konfekoop-eko presidente Rosa Lavinek ildo beretik hitz egin zuen: "Kooperatibismoa ez da erabaki organoetan bakarrik eraikitzen, nahiz eta emakumeek organo horietara iristen jarraitzen dugun, enpresen lidergoa eta zuzendaritza eskuratzeko igo beharreko malda, batzuetan, oso aldapatsua bada ere. Kooperatibismoa, batez ere, ekipoetan eraikitzen da".
EAEko 50 enpresa kooperatibotako ordezkariak elkartu ziren ekitaldian. Emakume omendu guztien izenean esker hitzak izan zituen aitortzagatik Andere Arriolabengoa LKS Nexteko abokatu laboralistak eta LKS Nexteko berdintasun batzordeko kideak.
