Tril Emakume Taldea izango da Aretxabaletan aitortza jasoko duena martxa abiatu aurretik. "Tril 1994an sortu zen, Loramendi elkartearekin batera, Aretxabaletan emakumeen artean euskararen erabilera sustatzeko helburuarekin. Astero biltzen hasi ginen euskaraz hitz egiteko, eta gero, feminismoaren eta bestelakoen ikastaroak hasi ginen antolatzen, gaur arte", adierazi du Jasone Gorroñok, Tril Emakume Taldeko kideak. Hala, gaur egungo mugimendu feministaren aitzindaritzat har daiteke Aretxabaletan Tril Emakume Taldea, eta horren adierazle da txoko feministari ere Tril izena jarri diotela, saretze eta ahalduntze gune izateko asmoz.
Aitortza Erañari
Eskoriatzan, berriz, Begoña Eraña izango da Eskoriatza Kirol Elkarteak omenduko duen emakumea. 80ko hamarkadan Atxorrotx gobernuz kanpoko erakundean aritu zen, eta Hego Amerikan eta Boli Kostan lankidetza-proiektuetan parte hartu zuen. 1992an, San Viator ikastetxeko fraideekin batera, familia bosniarrak hartzen lagundu zuen. 2008ko krisian, Caritasen bidez herriko familiei babesa eman zien… Musikan ere konprometitua izan da; izan ere, 14 urtez Gorosarri Abesbatzako kide izan zen eta, gaur egun, Beheko Errota Musika Eskolarekin jarraitzen du. Bi agintalditan zinegotzi ere izan da Eskoriatzako Udalean, eta euskararen aldeko ekimenetan ere parte hartzen du; adibidez, Korrikan. Hala ere, hark azpimarratu du ekimen guztietan laguntzaile aritu dela, antolaketa-lanak bere gain hartu gabe, eta ez duela protagonismorik nahi. "Taldean egin dira aitortzen dizkidaten ekimen horiek guztiak. Beraz, eskerrak eman eta aitortza proiektu hauetan parte hartu duten guztiei eman beharrean gaude. Atxorrotx GKEko urteak eta Boli Kostan 300 haur baino gehiago eskolatzen lagundu izana izan dira berezienak".
Aldarrikapen eguna
Martxoaren 8ko lehenengo ekintza nagusia izango da Aresko Emakume Martxa, baina, ondoren, Mugimendu Feministaren bazkaria egingo dute Egokiena elkartean; 17:30ean, elkarretaratzea izango da, trikitilariek lagunduta; eta 18:00etan, manifestazioa, Fernando Eskoriatza plazatik abiatuta.