Europar Batasunak Israelekin duen Elkartze Akordioa "osorik etetea" eskatzeko sinadura bilketa abiatu du Debagoieneko EH Bilduk. Izan ere, alderdi politikoaren esanetan, akordio honek "gerra-krimenak eta genozidioa egiten dituen Estatu bat legitimatu eta finantzatzen du", Israel giza eskubideak eta nazioarteko zuzenbidea sistematikoki urratzen ari den bitartean".
EH Bilduk gainera, erabaki hori hartzeko ezin dela "gehiago itxaron" ere nabarmendu du, honako arrazoiengatik: Batetik, "zibilen hilketa eta herri baten aurkako sarraski jarraitua". Bestetik, "milaka pertsonaren desplazamendu behartua". Gazako ospitaleen eta osasun zerbitzuen "suntsiketa sistematikoa" ere aipatu dute, baita "Laguntza humanitarioaren blokeoa". Azkenik, Israelek egindako "Nazioarteko Zuzenbidearen urraketa larriak" ere gogoratu dituzte.
Europar Batasunaren "erantzukizuna"
Alderdi politikoaren ustez ,"Europar Batasunak indarrean mantentzen du Israelekin duen Elkartze Akordioa, harreman ekonomiko eta politikoak lehenetsiz bizitzen gainetik". Horregatik, beharrezkotzat jo dute "etsipenean erortzea nahi dutenen aurrean, herritarren aktibazioa". Horretarako, sinadura bilketa telematikoa abiatu dute, "munduko herrientzat itxaropen mezua helarazteko eta giza eskubideekin koherentea den Europa bat aldarrikatzeko".
Sinatzeko hitzordu presentzialak
Sinadura, esteka honen bitartez egin daitekeen arren, Debagoieneko EH Bilduk hainbat hitzordu presentzial antolatu ditu bailaran. Antzuolan, asteartetan bilduko dituzte sinadurak, Olaranen izango da, 17:30ean; Arrasaten, martxoaren 2an (16:00-17:30), martxoaren 4an (19:00-20:00) eta martxoaren 9an (17:30-19:00) egingo dira hitzorduak; Oñatin azkenik, martxoaren 5 eta 6an egingo dituzte sinadura bilketak, 18:00etatik 20:00etara. Arrasate eta Oñatiko sinadura bilketak, herri horietako EH Bilduko bilgunean egingo dira.