200 pertsona baino gehiago bildu ditu Hemen bazara leloarekin garatu den ekitaldiak. Ordezkaritza instituzional zabala izan du, "eta horrek Aspegik gizarte berdinzaleago baten alde egiten duen lana berresten duela" adierazi dute antolatzaileek. Ekitaldiak enpresa-sarea "benetako berdintasunerantz eraldatzen jarraitzeko ekintza-dei gisa" balio izan du.
Bi sarietako bat Leire Mugerzari eman diote. 2022tik Mondragon Kongresuko presidente, Industria-ingeniari teknikoa eta Kooperatiba-zuzendaritzan masterduna da, eta, saria emateko zergatien artean daude, besteak beste, "bere ibilbidea kooperatibismoari erabat lotuta egotea, eta estatuko gobernantza sozioekonomiko eta laboralean figura estrategikoa izatea –Ekonomia eta Gizarte Kontseiluko (EGK) kidea eta Ekonomia Sozialeko Emakume Liderren taldeko kidea ere bada–", Aspegiko ardurandunen esanetan.
Mugerzak sakoneko aldaketa kultural baten beharra azpimarratu du saria jasotzerakoan: "Asko egin dugu aurrera: legeak daude, berdintasun-planak eta gizarte-kontzientzia handiagoa. Baina erronka nagusia kulturala da. Emakumeek libreki erabaki ahal izatea lortu behar dugu, besteen aurreiritziekin kargatu gabe, eta gizarteak erabaki horiek errespeta ditzala. Aldaketa hori gabe, aurrerapen formalak ez dira nahikoak izango".