Azken urteotan hainbat mendi korrikalariri laguntzen ibili badira ere Raosetik 2026ra begira egin dute benetako apustua, eta kirol kluba osatu dute hamaika lasterkarirekin. "Orain arte halako proiektu batek eskatzen zuen denbora eskaini ezinka nenbilen, eta orain eman dugu pausoa, hau ametsa da", adierazi du proiektuko gidari Oscar Nietok.
Alexander Gonzalez, Axi Alonso (Oñati), Aimar Larrea (Antzuola), Julen Dobarro, Izaskun Olleta, Julen Gaston, Aitor Ugarte (Aramaio), Mikel Arriola (Aretxabaleta), Mikel Goikoetxea, Jokin Egurbide (Aretxabaleta) eta Laura Rodriguez izango dira aurtengo denboraldian Raosen elastikoaz korrika –eta mendiko eskia– egingo dutenak.
Aurkezpen ekitaldian Ainhoa Lendinez kazetariak aurkeztu ditu atletak banan-banan, euren asmo eta helburuen berri eman eta ondoren dantzariek aurreskua dantzatu diete. Astelehenean, Harmailatik saioan (20:00, 22:00), zabal landuko dute aurkezpenak emandakoa.