Urte osoko programa antolatu du Humanitate eta Hezkuntza Zientzien Fakultateak, bere 50. urteurrenean, eta otsailerako ere kulturarekin lotutako hainbat jarduera izango dira.
Otsaileko ekitaldi nagusia Euskal kultura gaur eta bihar jardunaldia izango da; euskal kulturaren egungo egoeraz eta erronkez hausnartzea da topaketaren helburua. Otsailaren 25 eta 26an ospatuko da Aretxabaletan, eta Euskal Kulturaren Eragiletzako masterra egin duten ikasleak izango dira protagonistak; master amaierako lanetan egindako ikerketen emaitzak aurkeztuko baitituzte.
Mondragon unibertsitateak adierazi duenez, masterraren xedea da "hainbat arlotan lan egiteko prestatuta egongo diren kultura-eragileak heztea". Horren harira, ikasturtearen hasieratik, Mondragon Unibertsitateak Kultur eta Sormen Industrietako gradua jarri du abian, sektore horretan prestakuntza espezifikoa duten profesionalak hezteko.
Lau jarduera guztira
Euskal kulturaren inguruko jardunaldia, ez da Humanitate eta Hezkuntza Zientzien Fakultateak antolatutako jarduera bakarra izango; beste hiru jarduera ireki ere antolatu dituzte, Eskoriatza eta Aretxabaletako hainbat gunetan izango direnak. Hona hemen guztiak:
- Momotxorroak. Kaos baten istorioa dokumentalaren proiekzioa
Otsailaren 11n, 18:30ean
Eskoriatzako Zaldibar Antzokian - Itzulera, Dejabu konpainiaren antzezlana
Otsailaren 12an, 19:00etan
Aretxabaletako Arkupe Kultur Etxean - Jon Basaguren kontzertu akustikoa
Otsailaren 17an, 11:00etan
Eskoriatzako Campusean - Euskal kultura gaur eta bihar jardunaldia
Otsailaren 25ean eta 26an
IdeiEnean, Aretxabaletako Campusean