Arrizabalagak eta Bergarak txapelketan jokatutako lau partidak irabazi dituzte eta lehen postuan daude. Aldai-Arrillaga bikoteak ere lau puntu ditu, baina bi partida galduta.
Itsasuko partidan Olatz Arrizabalaga nabarmendu zen. Gernikarrak erakutsi zuen seigarren txapela gura duela eta helburu horretarako "ondo prestatuta" dagoela. Hark ezarri zuen partidaren erritmoa, "pilotari beste abiadura bat sartuz". Saketik ere min handia egin zuen eta, gainera, Bergarako Arrate Bergara bikotekideak horretan lagundu zion. Beste aldean izan zituzten Oñatiko Madalen Etxegarai eta Aretxabaletako Irati Betegi; horiek ez zuten euren egunik onena izan eta ezer gutxi egin ahal izan zuten aurkarien nagusitasunaren aurrean, 22-6 galduz.
Bigarren partida orekatuagoa izan zen eta 22-17 irabazi zien Ibarrolak eta Erasunek Zabaletari eta Bertizi.