Ligan puntu bateko aldea baino ez dute txantxikuek, eta joanekoan arrasatearrek 27-25 irabazi zuten, Arrasaten. Hala, gaur egun, biak ala biak sailkapenaren erdialdean daude, beste hainbat talderekin batera, eta jardunaldi garrantzitsuak dituzte aurretik. Izan ere, batetik, jaitsiera postuetatik urrundu nahi dute denek, eta, bestetik, igoera fasea jokatzea ahalbidetzen duen bosgarren postuarekin amesten dute. Eta hori da orain helburu nagusia, bi puntura –arrasatearrek hirura– baino ez dagoen Munttarpe (16) harrapatzea. Biharko derbira begira bi taldeak datoz iazko asteburutik aho zapore onarekin; arrasatearrek 24-22 irabazi zuten Txingudiren kontra eta Fagor Professionalekoek beste horrenbeste egin zuten Zumaian, Pulporen kontra (26-28).
Bergara ere lehia horretan
Faserako sailkatzeko postuen lehian, baina, Fagor Professionalekin eta Arrasaterekin batera Bergarako Soraluce BKE ere saltsan dago. Are gehiago, haiek seigarren daude, Munttarperen puntu kopuru berberarekin (16). Azkeneko hiru partiduak jarraian irabazi eta gero, Txingudikoen kontra jokatuko dute mahoneroek bihar (19:00, Irun).