"Espetxe-legeria arrunta aplikatzea da bidea gaur egun askatasunik gabe dauden pertsonak etxera itzultzea ahalbidetzeko", esan dute Sare Herritarretik. "Bakea eta bizikidetza ez dira posible izango indarkeriaren biktima guztien errespetua, aitortza eta elkartasuna oinarri ez badira".
Milaka lagunen eta askotariko erakundeen babesa jaso du aurten ere euskal presoen eskubideen alde urtez urte egiten den mobilizazio deialdiak eta jendetzak hartu du parte Casillatik abiatu den manifestazioan. Ekimenarekin bat egin dute, esaterako, ondorengo alderdi politikoek eta sindikatuek: EH Bai, EH Bildu —Sortu, EA eta Alternatiba–, Ahal Dugu, ELA, LAB, ESK, Steilas, Hiru, EHNE, CGT, CNT Etxalde, Junts per Catalunya, ERC, CUP, BNG, eta Mes per Mallorca.
Ezin da gehiago luzatu zioen pankarta joan da manifestazioaren buruan. Gazteek ere eraman dute haien aldarria eta Ezin da belaunaldietan luzatu zioen beste pankarta bat zabaldu dute.
Goizean ere izan dira ekintzak Bizkaiko hiriburuan. Sare Herritarrak antolatuta pailazoek, musikariek eta bertsolariek girotu dute Bilboko Zazpikaleak goiz osoan zehar.
