Errege eguna kolore zuriz heldu da Debagoienera. Gauez lehen elur malutak erori ostean, elurtuta esnatu dira ibarreko herri gehienak. Gipuzkoa osoa abisu horian dago elurraren eraginez, eta horrela jarraituko du 15:00ak arte.
Neguko Bidezaintza Plana martxan
Errepideei dagokionez, Eusko Jaurlaritzak Neguko Bidezaintza Planaren fase operatiboa aktibatu du. Planak, elurra kentzeko 215 makina, tona askoko ibilgailuak kentzeko 7 garabi astun eta koordinazio- eta zaintza-lanetarako lagungarri izango diren beste 130 ibilgailu aktibatzeko aukera jasotzen du.
Makinak etengabe lanean dabiltzan arren, Jaurlaritzak errepidean arreta handiz jokatzeko eskatu du. Errepidez ez bidaiatzea gomendatu dute, eta bidaiatzekotan, garraio publikoa lehenestea. Autoa hartu behar izanez gero, zenbait errepidetan kontu handiz ibiltzeko ere eskatu dute, tartean; Leintz Gatzagako bidean, Kanpazarren eta Pagatzako bidean. Deskargako autobian zein Kurtzetako mendaterako bidean beharrezkoa da autoari kateak jartzea.
Bidali zure argazkia
Elurretan ateratako zure argazkiak argitaratzea nahi izanez gero, bidali mezu bat Whatsappez edota Telegram bidez 688 69 00 07 zenbakira.