Euskararen Pizkunde berriaren aldeko apustua babesteko elkartu ziren milaka lagunek, Euskal Herrian euskaraz kantuaren doinuekin eman ziote hasiera atzo, zapatua Bilbao Arenan egindako ekitaldiari. Guztira 6.500 euskaltzaleren etxe bilakatu zen Miribilla eta bertara gerturatzeko autobusa antolatu zuten bailarako euskara elkarteek: Arrasate Euskaldun Dezagun, Loramendi eta Jardunek.
Aldarrikapenez jositako ekitaldia izan zen, artisten ekarpenen bidez eraikitakoa: musikariak, aktoreak, sortzaileak, bakoitzak bere alea jarri zuen. Euskalgintzako hainbat eragilek ere izan zuten solasteko tartea: Korrika eta Euskaraldiko arduradunek esaterako.
Euskaltzaletasunaren indar eta batasun erakustaldi bat egin nahi izan zuten, aldi berean, euskararen normalizazioa eta biziberritzea gizarte guztiaren ardura dela ulertaraziz. Bestalde, hizkuntzaren politiketan premiazkoa den jauzia bultzatzea ere aldarrikatu zuten.
Ekitaldiaren amaieran Kontseiluko idazkari nagusi den, Idurre Eskisabel Larrañagak hartu zuen hitza eta euskaltzaleak antolatzeko dei egin zuen, baita eremu guztietan euskaltzale izateko ere.
Euskaltzaleen sarea josten jarraitzeko, hurrengo mobilizaziorako deia egin zuten, ekainaren 13an, Iruñean.