Urteetako lanaren ondoren, ostiralean ikusi zuen argia Barrenak, Debabarreneko informazio lokala landuko duen komunikazio proiektuak. Proiektuaren atzean dauden euskara elkarteek adierazi dutenez, komunikazio proiektuak "egitura indartsuagoa eta profesionalagoa" izango du, "eduki multimedia gehiago" eskaini ahalko ditu, eskaintzak "urrunago" hedatzeko aukera emango die komertzioei: "Oro har, duen dimentsio eta inpaktu handiagatik, Barrena izan daiteke azken urteotan Debabarrenean euskara biziberritzeko abiatu den ekimenik garrantzitsuenetakoa, ezpada garrantzitsuena".
Pil-pilean Herri Komunikabideko kazetari eta Barrena proiektuaren bultzatzaile den Egoitz Unamunok ere honela azaldu du egitasmoa: "Eskualdean erreferente izango den komunikabide bat sortzea, zabala eta sendoa. Gaitasuna izango du gaur eguneko euskarrietara egokitzeko eta debabarrendar guztiei bailara osoko informazioa euskaraz paperean eta digitalean eskainiko die. Debababarrendar guztiok dugu ondoko herrietako berri euskaraz jasotzeko eskubidea eta Barrenak horixe eskainiko du Debabarrenean, lehen aldiz euskaraz".
Unamunok berretsi du Barrena Komunikazio Taldeak eskualde osoko hedabide izateko bokazioa duela eta datozen hilabeteetan ahalegin guztiak egingo dituztela elkarlana bideratzeko bailarako ahalik eta eragile gehienekin. Bide horretan, Barrenak lankidetza hitzarmena sinatu berri du Eibarko Arrate Irratiarekin, eta ondorioz, irratiko audiorik esanguratsuenak Barrena.eus webgunean ere entzun ahalko dira.
Gobernantza publiko-soziala
Proiektuari aurre egiteko, Ermuko, Soraluzeko, Elgoibarko eta Debako euskara elkarteen artean Barrena Komunikazioa Koop. S., irabazi asmorik gabeko kontsumo kooperatiba soziala sortu dute. Jabetza nagusia bazkide erabiltzaileena (euskara elkarteena) izango den arren, asmoa dute kooperatibaren gobernantzara beste bi hanka gehitzeko: langileak eta udalak. Hala, 2026an langileak kooperatibako lan-bazkide egingo dira eta udalak ere gonbidatuko dituzte kooperatiban parte hartzera, bazkide laguntzaile figuraren bitartez. Izan ere Barrena izaera publiko-sozialeko kooperatiba izango da