2023ko ekainean erakunde publiko eta pribatuen jardueran eta kudeaketan euskarak duen garapen-maila ebaluatzeko, egiaztatzeko eta aitortzeko sistema arautzen duen dekretua onartu zenetik, hirugarren aldiz antolatu dute ekitaldia. Bertan erakunde publiko eta pribatuek euskararen kudeaketan eta garapenean eman dituzten aurrerapausoak aitortu dituzte Bikain kalitate ziurtagiriak eta Harrobi diplomak banatuta. Honako hauek dira goi mailako Bikain ziurtagiria jaso duten bailarako erakundeak: Fagos S. COOP, Antzuolako Udala, Matz-Erreka, Ikerlan S. COOP eta Arteman Komunikazioa KOOP. ELK.
Hizkuntza Politika sailburuorde Aitor Aldasorok erakunde publiko zein pribatuen konpromisoa eta lana azpimarratu ditu euskararen normalizazioan: "Garbi dugu euskara gure bizitzako arlo guztietara zabaltzea dela gure helburua. Bide horretan, lan-eremuan euskararen erabilera handitzea lehentasunezkoa eta estrategikoa izango da eta Lanera proiektuaren bidez zein Bikain eta Harrobi ziurtagiri hauen bidez, bide horretan aurrerapausoak ematen jarraituko dugu".