"Hemendik aurrera, Euskal Herriko Ikasle Antolakunde Sozialista (IAS) gisa jarraituko dugu lanean. Izen berri honekin, batetik, gure izaera sozialista-iraultzailea nabarmendu nahi izan dugu; eta, bestetik, azpimarratu dugu gure jardun-eremua Euskal Herria dela, zeinetan nazio-zapalkuntzari aurre egitea eta hura deuseztatzea lehentasunezkoa den oraindik ere", adierazi dute.
VIII. kongresua "aurrerapausoa" dela erantsi dute, "aurreko belaunaldien lekukoa hartu eta beraien ibilbideak utzitako irakaspenetatik proposamen estrategiko eta organizatiboa gaurkotu eta garatu" dutelako.
Azaldu dute "ikasle langileen interesak babestuko dituen ikasle-antolakundea" izan nahi duela IASek, eta "estrategiko" jo dute "hezkuntza-sistema sozialistaren aldeko hautua egitea".
Etapa berriari "indarrez eta ilusioz beteta" ekingo diotela gaineratu dute, eta eskualdean ere eman dela izen aldaketa: "Ikasle langileon interesen alde antolatzen eta borrokatzen jarraituko dugu Debagoienetik".