Gipuzkoako Foru Aldundiko Jasangarritasun Departamentuak sustatu du ekimena Hondakinak Prebenitzeko Europako Astearen esparruan. Ikasleek birziklatutako materialetatik sortutako pieza artistiko eta eskulturak bildu dituzte.
Helburua, "eredu zirkular baterako trantsizioan hezkuntzak betetzen duen funtsezko eginkizuna ikustaraztea" dela azaldu du Jasangarritasuneko diputatua den Jose Ignacio Asensiok, ikasleen eta irakasleen inplikazio eta sormena balioan jarriz: Ekonomia zirkularra ikasgeletan hasten da. Eskultura bakoitzak dagoeneko martxan dagoen kultura-aldaketa bat islatzen du".
Hamaika ikastetxe
Oñati BHI eta Aretxabaleta Lanbide Eskolarekin batera, Mutrikuko CIFP Kardala LHII, Azkoitiko Lanbide Heziketa LHII, Tolosako Peñascal Kooperatiba, Donostiako Ortzadar Ikastetxea eta Easo Politeknikoa, Irungo Mendibil Formazio Zentroa, Zarautzeko Oteitza Lizeo Politeknikoa, Andoaingo CPIFP La Selle Berrozpe eta Elgoibarko Meka Lanbide Eskola saritu dituzte. Guztira, hamaika ikastetxe.
Ikastetxe horiek egindako lana aintzatetsi, eta ekimenaren hezkuntza eta komunitate-balioa nabarmendu dituzte sari banaketa ekitaldian.
"Apustu estrategikoa"
Azkenik, Jasangarritasun departamenduak azpimarratu du ekonomia zirkularra "apustu estrategikoa dela, "lurralde bidezkoago, berritzaileago eta erresilenteago baterantz aurrera egiteko: "Sektore horrek 10.000 enplegu inguru sortzen ditu gaur egun, eta BGParen %10 inguruko ekarpena egiten du, enplegu berdearen eta ekoizpen modernizazioaren motor gisa finkatuz".
