2023an, Hezkuntza Lege berriaren testuinguruan sinatu zuten Eusko Jaurlaritzak eta LAB sindikatuak "hezkuntza-sistema guztiko langileen lan-baldintzak arautzeko" akordio laborala. Bada, hor sinatutako baldintzak "ez direla betetzen" argudiatuta hasiko dira itxialdiak. LABek adierazi duenez, akordioak jasotzen du, besteak beste, "Hezkuntza Sailak Ikastoletako lan perfilak eta baliabideak administrazioaren jabetzako ikastetxeekin homologatzeko azterketa egingo zuela", eta, gaur gaurkoz, azterketa horren inguruko "berririk ez dutela" salatu dute: "adostutako mahai teknikoa sortu ere ez da egin".
Horrez gain, "2027rako Ikastoletako langile guztien soldatak sare publikoko langileekin parekatzea" ere adostu zutela esan dute. LABen ustez, "bide horretan emandako pausoak ez dira esanguratsuak". "Bi urte barru parekatzera iritsi nahi bada, pausoak ematen hasiak egon beharko lirateke, eta ez da hori gertatzen ari", gaineratu dute.
Egoeraren aurrean "konpromisoa"
Bestetik, LABek sare publikoko langileen baldintzak "ezin direla zalantzan jarri" adierazi du: "LABen helburua da euskal eskola publiko eta komunitario berri bat sortzea, beste publikotasun eredu batekin, auto-kudeatua, nazionala eta elkarlanean oinarritutakoa. Konfluentzia baten bidez helburu horretara iristeko modua da azpi-sektore guztietako baldintzak parekatzen joatea".
Horregatik egoeraren aurrean "konpromisoa" berretsi dute. "Lan-eskubideak defendatzea euskal eskola publiko eta komunitarioa defendatzeko modu bat da", adieraziz amaitu dute.
Itxialdiak gaur
Bergarako Aranzadi ikastolan elkarretaratzea egingo dute, gaur, eguaztena, Herrilagunak kalean, 19:00etan. Ondoren, itxialdia hasiko dute ikastolan bertan –itxialdiaren harira, egitaraua eta esku-orri banaketa ere antolatu dute–.
Oñatiko Txantxiku ikastolan berriz, 19:00etan hasiko da itxialdia, patioan aterako duten argazkiarekin. Euskal dantza eta kantak izango dira horren ostean.