Atzerapen honek "arduratu" egiten ditu suhiltzaileak, haien ustez, ezarritako epe horiek "ez direlako inoiz betetzen". Gaineratu dutenez, horrek, "eskaintzera doazen 68 suhiltzaile lanpostuetatik 23k derrigorrezko euskara-eskakizunik ez dutela izango esan nahi du". Testuinguru honetan, Gipuzkoako suhiltzaile zerbitzuak aldarrikatu gura izan du, bere irrati komunikazioetan "euskara hutsean lan egiten duen zerbitzu bakarra" dela, eta langile guztiak euskaldunak izateak, zerbitzu barruko harremanak, bilerak eta formakuntzak "euskaraz egin ahal izatea" bermatzen duela. "Gaur egungo errealitateak, herritarrei eskaintzen zaien zerbitzua, %100ean elebiduna izatea bermatzen du", gaineratu dute.
Epaitegietatik datorren neurria
Aldundiaren erabakia, lanpostu eskaintza publikoetan euskara-eskakizunaren aurka epaileek hartutako neurrian oinarritzen da. Hala ere, suhiltzaileek uste dute, lanpostuan euskaldunak ez diren langileak sartuko balira, honek "izaera euskalduna" galduko lukeela. "Jakina da edozein taldetan euskaraz ez dakien bat egotea nahikoa dela taldearen harreman hizkuntza gaztelania izatera pasatzeko", diote.
Gipuzkoako suhiltzaileek "atzera pausu handi" bezala definitu dute hizkuntza errealitatea aldatzea, eta, horregatik, Aldundiari eskatu diote hartutako erabakiaren inguruko "hausnarketa" egin dezala, eta plaza guztiek "derrigorrezko euskara-eskakizuna izan dezatela".