Hildakoak gogora ekartzeko eguna izango da biharkoa

Bihar, azaroaren 1a, Domu Santu eguna da; hildakoak gogoratzeko urteko egun nagusia izaten da, eta Eliza Katolikoarekin lotutako hitzorduak egoten dira egun osoan. Hala, herritar ugari batuko dira herrietako hilerrietan eta elizetan, eta egun horri begira hainbat berritasun egongo dira bailarako herrietan. Oñatin goizeko zortzietatik arratsaldeko zortzietara bitartean egongo da irekita hilerria, eta herribusak han egingo du geldialdia. Herritar asko pilatzen den eguna izanik, Udaltzaingoak "norbere ondasunak zaintzapean mantentzeko gomendioa" egin du. Arrasateren kasuan, 08:30etik arratsaldeko zortzietara bitartean irekiko dituzte hilerriko ateak, eta autobusa iritsiko da hara; 10:00etan irtengo da, Gorostitza auzotik, 18:00ak arte, orduro –12:00etatik 15:00etara bitartean ez da autobus zerbitzurik egongo–. Bergarako hilerriari dagokionez, goizeko zortzietan zabalduko dituzte ateak, eta arratsaldeko zortzietara bitartean izango dute bergararrek hilerrira joateko aukera.