Arrasateko Al-Andalus egoitzan batu ziren estreinakoz, martxoan, eta Bergarakoek egingo dituzte bihar anfitrioi lanak. "Ikasle helduak dira, garai batean ibilitakoak batzuk eta berriz eskoletara itzuli direnak. Geroz eta ikasle heldu gehiago dauzkagu, eta ondo pasatzeko asmoz datoz; beraz, ekitaldi hori eurek ondo pasatzeko egun bat da. Era berean, bi herritako ikasleek elkar ezagutzeko ere elkargune polita da. 75 lagun izango gara", azaldu du Bergarako Musika Eskolako zuzendari eta trikiti irakasle Aritz Alustizak.
Kalejira eta bazkaria
Aralar tabernatik abiatuta, kalejira egingo dute Arrasateko Trikitixa Eskolako eta Bergarako Musika Eskolako pandero-joleek eta trikitilariek elkarrekin, 12:00etan hasita, eta ondoren, Laino tabernan bazkalduko dute. "Bazkalostean, mikro irekia izango da, eta han festarako ordua izango da. Ziur gaude zapatu honetan oso gustura egongo garela guztiok eta hurrengo bat antolatzeko gogoa etorriko zaigula. Baina ez dugu behartu nahi, ikusiko dugu", gaineratu du musikariak.