Txomin Madina Milikuak gidatuta, datuen analisi sakonetik abiatzen den saioa da Datuetatik tiraka, informazioa modu argian eta erakargarrian emateko asmoz; horretarako, gainera, datu soiletatik harago, gaian adituak eta arituak direnekin elkarrizketak eta erreportajeak egiten dituzte, nork bere jakintza eta bizipenetatik; horrez gain, debagoiendarrei inkestak ere egi- ten zaizkie, herritarrei hitza emateko asmoz.
Hilaren 9an, atzo, estreinatu zen, hain zuzen ere, Datuetatik tiraka saioaren bigarren denboraldiko lehendabiziko atala, eta ehiza izan zen aipagai: Araba, Bizkai eta Gipuzkoako ehiza-baimenen kopuruetatik hasita, Debagoieneko uxaldiak izan dira aztergai, ehiztariekin, ekologistekin eta herritarrekin hitz eginda, besteak beste. Honako hauek dira, berriz, ondorengo saioetan landuko diren gaiak: urriaren 30ean, delituak; azaroaren 20an, emakumeen aurkako indarkeria; eta abenduaren 18an, Gabonak.
Eguenetan ikus daitezke saioaren atal berriak Goiena telebistan, hiru astean behin, 20:00etan eta 22:00etan. Telebistan ikusi ezin dezaketenek, gainera, saioak nahieran ikusteko aukera izango dute.
'Saretzen' elkarlana
Datu-kazetaritza oinarri hartuta, EITBk eta Tokikom tokiko komunikabideen sareak martxan duten proiektua da Saretzen, datuak elkarrekin jorratzea eta modu bateratuan kudeatzea helburu duena; betiere, hedabideen arteko elkarlanari garrantzia emanez. Hiruzpalau gai landu ohi dira urte honetan, eta udazkenean izango da 2025eko azkenekoa.