Bederatzi lagunek ordezkatuko dute Euskal Herria ardi-moztaileen munduko txapelketan, Zeelanda Berrian, eta tartean izango dira Mikel Galvez eskoriatzarra eta Mikel Velasco arrasatearra, euskal selekzioko partaide izateko txartela lortu ondoren. Makinarekin arituko dira, hain zuzen ere, bi parte-hartzaile, beste bi guraizeekin –tartean da Galvez– eta azkeneko biak artilari –Velasco, esate baterako–; haiekin batera, berriz, taldeburu batek, epaile batek eta entrenatzaileak osatuko dute taldea. Galvezek, ordea, ez du martxora arte itxarongo hara bidaiatzeko, azaroa amaieran joango baita denboraldi osoa han egiteko asmoz txapelketara arte.
Euskal Ardi Moztaileen Elkarteak antolatutako Euskal Herriko Ardi Moztaile Txapelketan ere izan ziren bi debagoiendarrak, eta lehen lauen artean sailkatu zen eskoriatzarra, hainbat kategoriatan parte hartuta: Euskal Herriko txapelketan, guraizeekin, laugarren sailkatu zen; nazioartekoekin partekatutakoan, berriz: open kategorian, guraizeekin, bigarren izan zen; eta laugarren seniorrean. Velasco ez zen lehendabizikoen artean sailkatu.
