Berbalagun egitasmoa bueltan da Debagoienean, eta horren berri eman dute jardunean diharduten euskara elkarteek. Azaldu dutenez, euskaraz aritzeko gogoa duten herritarrak talde txikitan elkartzen dira, eta ordubeteko saio informalak egin ohi dituzte astero, "hizkuntza ohiturak landuta eta euskaraz jarduteko konfiantza irabazita". Eskolak, gainera, ez dira teorikoak, elkarrizketen bitartez bizipenak partekatzea eta lagun berriak egitea baita ardatza. "Euskara bizirik dago, baina erabiltzeko aukera sortu behar dugu. Berbalagunek lagunarteko giroan euskaraz aritzeko aukera eskaintzen dute. Bidaia hau elkarrekin egitea da garrantzitsuena".
Egitasmoan parte hartzeko izen-ematea martxan da, eta horretarako baldintzetako bat da euskaraz komunikatzeko gutxieneko maila izatea. Horretarako, interesa duten herritarrek euskara elkarteetara, euskaltegietara eta Udaletara jo dezakete informazio bila.
- Arrasate, AED elkartea: 943 77 12 28 edo zaharberri@aerdelkartea.eus.
- Bergara, Jardun euskara elkartea: 943 76 36 61/605 71 24 69 edo jardunkultura@topagunea.eus.
- Aretxabaleta, Loramendi elkartea: 943 77 09 70 edo auzoko@loramendielkartea.eus.
- Eskoriatza, Udala: 943 71 46 88/661 74 63 76 edo berbalagunak@gmail.com.
- Elgeta, Berbetan: 688 64 80 41 edo elgetanberbetan@gmail.com.
Ekintza osagarriak
Asteroko hitzorduez gain, aurten, hainbat ekintza osagarri egingo dituzte, eta horietako bat da astrotopaketena: Unibertsoan barrena euskaraz lelopean, urriaren 10ean izango dira, Elgetako plazan elkartuta; horretarako, urriaren 7a, martitzena, da izena emateko azken eguna.