Biharko euskara, gaur liburuxka banatuko dute, beste ikasturte batez, 8 urte bitarteko haurrak dituzten gurasoen artean, hizkuntza ezagutza, erabilera-ohitura eta hizkuntzarekiko jarrera 8 urtera arteko epean finkatzen dela uste baita; aurten, gainera, euskaraz eta gaztelaniaz ez ezik, urdueraz eta arabieraz ere ondu dute. Mankomunitateak ikastetxeetara bidali ditu dagoeneko, eta haiek arduratuko dira gurasoen artean banatzeaz.
Funtsean, euskaraz dakiten gurasoendako zein euskaraz ez dakitenendako aholkuak jasotzen ditu liburuxkak, gurasoen artean ohikoak diren galderak erantzuteko: besteak beste, aholkuak ematen ditu euskaraz konplexurik gabe egiteko, erdarazko hizkuntza-ohiturak aldatzeko eta ingurune euskaldunak bermatzeko.