Atzo publikatutako Euskal Herriko Agintaritzaren Aldizkariak jasotzen du hainbat mediku lanpostu betetzeko Osasun Sailak zabaldutako lan-eskaintza publiko bereziaren esleipena. Gipuzkoarako 27 familia-mediku eta lau pediatra izendatu ditu Osakidetzak, horien artean bost familia-mediku Debagoieneko ESIrako.
Hain zuzen ere, honakoak dira: Aretxabaleta, Bergara eta Oñatiko osasun zentroetarako plaza bana, Arrasateko anbulatoriorako bat eta Elgetako kontsultarako beste bat. Debagoieneko ESIrako izendatutako bost familia-medikuak emakumeak dira eta astelehenean, hilak 22, dira lanpostu berrian hastekoak.
Prozesu berezia
Betetzeko zailak diren plazak osatzeko egin du esleipen prozesu berezia Osakidetzak. Guztira, 130 familia-mediku plaza eta 21 pediatra plaza esleitu ditu, gehienak Bizkaian. 800 hautagai aurkeztu dira.
Familia Medikuntzan eta Pediatrian betetzeko plaza zailtzat hartzen dira: arratsaldeko txanda dutenak, goizeko txanda izanagatik arratsaldera luzatu daitezkeenak, Etengabeko Arretako Puntuetara lotuta daudenak (PAC), kontsultategietakoak, espetxe-unitateetarako direnak zein profesionalari hainbat zentrotan aritzera eskatzen diotenak.