Kultura arloan euskaraz diharduten sortzaileen ekarpenekin osatzen da Durangoko Azokaren egitaraua, antolatzaileek jakinarazi dutenez, eta aurtengo edizioan ere helburu dute "ekitaldi sorta aberatsa" eskaintzea; bada, horretarako, proposamenak aurkezteko izen-ematea ireki dute, urriaren 6ra arteko epearekin. "Gunez gune, diziplina anitzetako artistek aurtengo nobedadeen berri emateko aukera izango dute".
2025ean euskaraz kaleratutako lanak aurkeztu ahal izango dira Durangoko Azokan, honako gune hauetan: Ahotsenea-n, liburuak eta diskoak; Irudienea-n, ikus-entzunezkoak; Taiala-n, literaturaz aparteko lanak, euskara hutsezkoak zein Euskal Herriari zuzenean eragiten dizkioten gaiei buruzkoak: Szenatokia-n, dantza, antzerki eta bakarrizketak; Kabia-n, teknologia berriekin lotutako ekintzak; eta Saguganbara-n, haurrei zuzendutakoak. Horrez gain, aurten ilustrazioen erakusketa bat egingo da, azokako urteko nobedadeetan argitaratutako irudiak ikusgai jartzeko; interesa izanez gero, izena eman behar da.
Izen-emate gehiago
Durangoko Azokaren lehen egunean, abenduaren 5ean, egingo da ikasleen goiza, eta hara joan nahi duten ikastetxeendako ere irekita dago izen-ematea, urriaren 6ra arte. DA!PRO topaketan parte hartu nahi duten musikariek eta familia-ikuskizunak taularatzen dituztenek ere izena emateko aukera dute, eta Zu Non, Han DA! egitasmoan parte hartu nahi dutenek.