Hiru herrietan egin dituzte aldarrikapen zaratatsuak, eta elkarretaratze amaieran irakurritako testuan "egoeraren larritasuna" gogoratu dute: "Nola gogortu liteke genozidio bat? Nola gogortu herri baten suntsiketa sistematikoa? Basakeria, masakrea, tortura… nola gogortu? Eta bai… Egunetik egunera terribleagoa da sarraskia… Zer da ba genozidioa etengabe gordintzen doan erabateko suntsiketa ez bada… Oihu lazgarriak isiltasun jasanezin azkenerako… Eta hemen, Palestinatik urrun, hitzak ere isilik daude, hutsik… Genozidio, sarraski, masakre, suntsiketa, tortura, basakeria… balioa galtzen dute gure etxeko sofan… kuxinen artean galtzen dira… esku artean dugun kafesnearen lurrunean..."
Oñatin protestara batu dira Atzeko Kaleko jaietako txorimaloak eta amaieran, testuaren irakurketaz gain, Hotz Oñatikoek pintxoak saldu dituzte Gernika-Palestina elkarteari emateko.