Aire libreko txapelketetan buru-belarri dihardute Andoni Calbano bergararrak eta Eneko Carrascal arrasatearrak –Maialen Axpe pertigista orkatilako ebakuntza batetik errekuperatzen dabil–. Eta Real Sociedadeko bi atleta debagoiendarrak nabarmendu dira Bilbon. Salto hirukoitzean Carrascal izan da Euskadiko onena (7,45) eta 100 metrotako lasterketan Calbanok irabazi du. Gainera, bergarrara 10.30eko langatik jaisteko kapaz izan zen, ehunen batengatik, eta marka horrekin (10.29) Euskadiko atleta azkarrena bilakatu da.
Errekorra Ander Garaiarrekin partekatzen du
Euskadiko 100 metrotako errekorra (10.34) bi hamarkada luzetan egon da Orkatz Beitiaren eskutan. Ondarroako atletak 2002an ezarri zuen marka hori, Salamancan, eta duela hilabete batzura arte Euskadiko gizon azkarrenaren titulua izan du bizkaitarrak. Maiatzaren 31n, Anoetan, Oiartzungo Ander Garaiarrek bost ehunen gutxiago erabili zituen 100 metrotako lasterketa egiteko, eta gainera, erreferentziazkoa den 10.30eko langa gainditu zuen (10.29). Bada, errekor berri horrek denbora gutxi egin du Garaiarren eskuetan, joan berri den asteburutik aurrera Andoni Calbanorekin partekatu beharko duelako Euskadiko gizon azkarrenaren titulua. Bergarakoak korrika egiteko zapatuko baldintza onak aprobetxatu zituen erlojua 10.29koan geratzeko.
Sasoian daude, hitzordu handien zain
Azken hilabeteotako lana bere fruituak ematen dabilela erakutsi dute, horrenbestez, Calbanok eta Carrascalek. Hala, uztailaren 12an federazio autonomikoen arteko Espainiako Txapelketak jokatuko dituzte, eta abuztuaren 1etik 3ra bitartean izango dute aire libreko hitzordu handietako bat, Espainiako txapelketa absolutua.