Lo egonik, kontzientziaren jarduera eskatzen duten zenbait ekintza automatikoki egiten dituen pertsona da somnanbulu, Euskaltzaindiaren Hiztegiaren hitzetan. Jateko pasta, eskuarki gari irinez egina, zerrenda luze eta zapal baten forma duena da, berriz, tallarin. Eta norbaiten arreta erakartzeko edo norbaitek esandakoaz halako zalantza erakusteko erabiltzen den hitza da ehem edo ejem: ejem, ejem, hobe pellokeriak albo batera uztea, esate baterako.
Hiru horiek dira, hain zuzen ere, Euskaltzaindiaren Hiztegian bildu dituzten forma berrietako batzuk, baina beste 771 izan zitezkeen, 774 jaso baitituzte guztira: meme, botox, derrapatu, saltsa bizkaitar, albariño, meza(ta)ko ardo, amigdalitis, ariketa fisiko, Gau Beltz, kuku bat egin, lanaldi partzial, haluzinagarri eta makiaveliko, besteak beste. Hala, forma berriak gehituta, guztira, 52.091 forma, 70.291 adiera, 116.226 adibide eta 519 esaera zahar dituzte jasota hiztegian
Handitze lanetan "etengabe"
Miriam Urkiak, Euskaltzaindiaren Hiztegiaren zuzendariak, adierazi du "dagoeneko oinarri sendo samarra" dutela hiztegian, forma berriei dagokienez, baina lantaldeak "etengabe" jarraitzen duela hiztegia handitzen: "Batez ere, berrikusten, osatzen eta hobetzen. Fintze-lana izan da seihileko honen ardatz nagusia: aditz erregimena berrikusi dugu, azpisarreretako definizioak, adierarik gabeko adierak, sarreretako gramatika- eta adiera-oharrak, taxonak, etab. berrikusten jarraitu dugu".