Casillatik abiatu da martxan, 17:30ean. Zanpantzarrek eta adar-soinuek ireki dute bidea eta haien atzetik ikurrina erraldoi bat, Euskal Herriak erabaki leloarekin. Jarraian, pankarta nagusia, eta aurpegi oso ezagunak hari eusten. Pankarta nagusi haren atzean erakundeetako ordezkariak kokatu dira; besteak beste, EAJko legebiltzarkide Markel Olano; eta EH Bilduko kide Pello Otxandiano, Nerea Kortajarena eta Maddalen Iriarte.
Euskalgintzako, kulturgintzako, beste mugimendu batzuetako, sindikatuetako, erakundeetako eta alderdi politikoetako ordezkariak batu dira, ikurrinak lepoan lotuta. Han egon dira bailarako hainbat udal ordezkari, eta norbanako.