Bihar hasiko da aurtengo Itzulia Women lasterketa, eta hiru etapetako lehena Debagoienetik igaroko da. Zumarragan hasiko da etapa, eta txirrindulariak, Udanatik jaitsi ostean, Oñatitik igaroko dira. Saihesbidean sartu eta Arrasateruntz egingo dute, gero, Aretxabaletarantz joateko. Debagoieneko azken geltokia Eskoriatza izango da; izan ere, 42,8. kilometroan Arlaban mendatea –hirugarren mailakoa– igo beharko dute txirrindulariek. Lehenengo etapa Agurainen bukatuko da.
Errepidean eragina
Lasterketa bailarako hainbat herritatik igaroko denez, eragina izango du trafikoan; hain zuzen ere, Oñatin, Arrasaten, Aretxabaletan eta Eskoriatzan. Oñatiren kasuan, lasterketa GI-2630 errepide nagusitik igaroko denez, itxita egongo da Udanatik Elorregirako bidea txirrindulariak pasatu bitartean; 9:45ean izango da hori. Gainera, errepide horrekin lotutako beste bide batzuetan ere eragina izango du lasterketak. Arrasaten, saihesbidea itxita egongo da lasterketa igaro bitartean, eta Aretxabaletan eta Eskoriatzan, herriko bi sarrerak itxita egongo dira txirrindulariak igaro arte (9:50etatik 10:50etara bitartean gutxi gorabehera).
