Prestazio berriak izango ditu hilaren 14tik aurrera, bihartik, Abiatu gailuak, Gipuzkoako Foru Aldundiak jakinarazi duenez. Haren hitzetan, "hobekuntzen artean" da gailua Espainian, Frantzian eta Portugalen ez ezik, Andorran ere erabili ahal izango dela aurrerantzean. Horrez gain, ibilgailua aldatuz gero, erregistratutako matrikula eguneratzeko aukera izango dute erabiltzaileek, gailua aldatu gabe, eta kudeaketa hori, gainera, era telematikoan egiteko aukera izango da, Bidegiren webguneko profil pertsonalean; hala ere, aurrez aurre egiteko aukera ere bada Bidegik Bergaran duen bulegoan.
Italiara bidaiatzen dutenendako, bestalde, gailu espezifiko bat eskaintzen du Bidegik, herrialdeko autobide eta aparkalekuetan ordaintzeko. Hori eskuratzeko, hala ere, gailu berri bat eskatu eta egungoa itzuli behar da, Bidegiren arabera: "4 euroko kostua du jaulkipenak, eta, aktibatu ondoren, Abiaturen funtzio, deskontu eta zerbitzu guztiak izango ditu. Urteko mantentze-tarifa 7 eurokoa izango da, Bidegik kudeatzen dituen gainerako gailuetarako bezala".