Jaiotza kopurua %3,8 jaitsi zen iaz Araba, Bizkai eta Gipuzkoan, Eustatek, Euskal Estatistika Erakundeak, emandako datuen arabera. Haren hitzetan, 12.937 haur jaio ziren bizirik 2024an, eta 13.453 izan ziren aurreko aldi berean: alegia, 2023an baino 516 ume gutxiago jaio ziren iaz. Gainera, Eustatek ohartarazi du 1975etik hiru lurraldeetan izandako "jaiotza kopururik txikiena" dela 2024koa.
Lurraldeetako egoerari dagokionez, hiruretan erregistratu dute jaitsiera: Araban, %5,5ekoa izan da –zehazki, 2.094 jaiotza–; Bizkaian, %3,7koa –6.421 jaiotza–; eta Gipuzkoan, %3,2koa –4.422 jaiotza–. Are gehiago, hilabeteak aintzat hartuz gero, gehienetan gutxitu dira jaiotzak, bitan izan ezik: urtarrilean eta maiatzean %6,4 eta %1,2 igo dira, hurrenez hurren.
Adina eta nazionalitatea
Eustaten arabera, ama izan diren herritarren adinaren bataz bestekoa 33,4 urtekoa da, eta horri nazionalitatearen aldagaia gehituz gero, ezberdintasunak daude: ama izan diren eta nazionalitate espainiarra dutenen kasuan, 34,3koa da bataz besteko adina; bestelako nazionalitateren bat duten herritarrenean, berriz, 30,8koa.
Horrez gain, datuak aztertuta, ondorioztatu du ezkontzaz kanpoko jaiotzak %50,6 izan zirela, eta jaiotako umeen erdia baino gehiago –zehazki, %50,5– lehen seme-alaba izan zela.