Debagoiendarrek Senpereko lakuraino eroso joateko aukera izango dute, maiatzaren 11n, Herri Urrats jaialdiaren harira. Loramendi, Jardun eta AED euskara elkarteek autobus zerbitzua antolatu dute, Seaskaren aldeko egun handian parte hartu nahi dutenentzat.
Autobusa Aretxabaletako Azbetik abiatuko da 8:30ean, Arrasateko Zalduspetik 8:45ean, eta Bergarako geltokitik 9:00etan. Itzulera, aldiz, 19:00etan izango da Senperetik.
Txartelak elkarteetako egoitzetan eskuratu daitezke maiatzaren 7ra arte. Prezioak honako hauek dira: 10 euro elkarteetako bazkideentzat eta 12 euro gainerakoentzat.
Gutxieneko partaidetza beharrezkoa
Antolatzaileek jakinarazi dutenez, azken azkenaldian autobus zerbitzuaren kostuak nabarmen igo dira, eta, horren ondorioz, gutxienez 30 plaza betetzen ez badira, irteera bertan behera geratuko da. Hori dela eta, herritarren parte-hartzea funtsezkoa izango da zerbitzua aurrera atera dadin.
