Apirilaren 17an, 02:00etan, hastekoak ziren grebarekin eta EAEko hiru hiriburuetara eta Loiuko aireportura joan-etorriak egiten dituzten autobus zerbitzuetan eta Debagoienekoetan izango zukeen eragina. ELAk adierazi du enpresak legez kanpoko grebatzat hartzeko mehatxua egin diela: "Greba behar besteko aurrerapenarekin ezagutu ez izana alegatu du Avanzak, baina ELAk gezurtatu egiten du hori, inpugnazio horren atzean langileak beldurtzeko eta grebari boikota egiteko asmoa baino ez dagoelako". Gaineratu dute langileen asmoen berri bazutela, horregatik hain zuzen ere, enpresak berak eman ziela greba egunen gaineko argibideak erabiltzaileei webgunearen bidez.
"Grebaren legezkotasuna" defendatu arren LAB eta Aurrera sindikatuek bertan behera uztea erabaki dutenez ELAk ere beste horrenbeste egin du, " langileen artean zatiketarik eta nahasmendurik ez sortzeko".
ELA "kezkatuta" agertu da enpresaren jarrerarekin, eta ohartarazi du gatazka ez dela amaitu, eta deialdi berriak egingo direla: "Are gehiago, greba mugagabearen aldekoa izango da".
