Elkartasun jaialdiaren agurrerako egitarau oparoa proposatu dute, egun bogan dauden taldeak gonbidatuta eta azkeneko urteetan lozorroan dauden talde batzuk berpiztuta. Eskualdeko ordezkaritza ere izango da azken jaialdi horretan: Brigade Loco, Añube, Sukena, Never Surrender eta asteon iragarri duten Latzen taldea. Hatortxurock.eus atarian daude sarrerak salgai.
Latzen taldea, berrituta
Zeresana sortu du sareetan eta kalean, asteon, Oñatiko taldearen itzuleraren iragarpenak. Aitor Uriarte (ahotsa), Joxemari Azpitarte (baxua), Iker Martinez de Zuazo (gitarra) eta Gorka Lazkano (bateria) oñatiarrek sortu zuten Latzen, 1993an. Heriotzari deika maketa eta Kontzientzia ala infernua eta Ardi Larruz diskoak argitaratuta, 1999an atseden hartu zuen laukoteak, eta 2008an itzuli ziren agertoki gainera, Infernuko Ateetan Tour birarekin.
Gorka Lazkano: "Taldea berpizteko arrazoia ez da izan, baina bultzada ederra eman digu"
Hamazazpi urte geroago, gaur egun beste musika talde batzuetan ari den Iker Martinez de Zuazo gitarra-jolea izan ezik, beste hiru kideak taularen gainera itzuliko dira, Legazpiko Yerko Ortiz gitarra-jolearekin laukote berria osatuta. "Lan-istripu batean atzamar bat galdu nuen, eta orain dela urte eta erdi inguru lokalera joaten hasi nintzen. Hasieran asko kostatu zitzaidan arren, moldatzen eta gozatzen joan nintzen gero; hori horrela, pretentsio handi barik, taldea berreskuratzea okurritu zitzaidan, eta hala komentatu nuen taldekideekin. Halako batean, lokalean elkartzen hasi ginen Uri, Joxe eta hirurok. Marti konbentzitzen saiatu nintzen, baina, beste proiektu batzuetan ari denez, denarekin ezin. Laugarren kidearen bila hasi ginenean Legazpiko Yerko Ortiz topatu genuen; oso ondo jotzen du gitarra eta elkarrekin bat egin dugu guztiz", kontatu du Gorka Lazkanok.
Kantu zaharrekin hasi, eta dagoeneko berriak sortzen ari dira. "Aurrera begira, uste dut gauza politak etorriko direla. Hatortxu Rocken jotzeko eskaintza pozarren hartu genuen. Ez da izan hori taldea berpizteko arrazoia, baina bultzada ederra eman digu".
Never Surrender ere, "pozik"
Andoni Iñurritegi Pottoko-k (ahotsa), Mikel Arriaran Arri-k (gitarra), Ander Durañona Dura-k (baxu-jolea) eta Asier Uribeetxeberria Atxi-k (bateria-jolea) osatzen dute Arrasateko Never Surrender taldea. 2002an hasi ziren entsegu-lokalean lanean eta 2005ean argitaratu zuten estreinako diskoa, Arrasateko Enboskada taldearekin batera, eta geroago argitaratu zituzten Aurrerapenaren izenean (2007), 11 istorio, broncka eta gau ero (2010) eta Bide zuzenetik oker (2012), eta beste hainbat diskotan ere hartu izan dute parte.
Asier Uribeetxeberria: "Hainbat ediziotan jotzeko aukera izan dugun arren, ezin izan dugu"
Lozorroan dago egun Never Surrender, taldekideek beste musika talde batzuetan jarduten badute ere. Hatortxu Rock jaialditik jaso zuten proposamenak, baina, berriz ere elkarrekin oholtza gainera igotzeko aitzakia polita eman die. "Aspalditik izan dugu jaialdi horretan jotzeko arantzatxoa. Modu batera edo bestera parte hartu izan ohi dugu, baina sekula ez oholtzaren gainean. Hainbat ediziotan jotzeko aukera izan dugun arren, ezin izan dugu gauzatu, baina oraingoan bai. Herritik sortutako ekimen bat izanda, elkarlanetik eraikia, musika jaialdi soil bat baino harago, gure pentsatzeko moduarekin oso bat dator", azaldu du Atxi-k.
