Eusko Jaurlaritzako Trantsizio Energetikoko sailburuorde Irantzu Allendek eta Ihobeko zuzendari nagusi Alexander Botok banatu dituzte Basque Circular BEST sariak gaur, apirilak 3; lau sari eta hiru akzesit hain zuzen ere. Sarituak aukeratu dituzte Basque Circular Summit biltzarreko EXPOn erakusten diren 150 produktu eta zerbitzuetatik, 49 enpresak aurkeztutako 65 hautagaitzaren artetik.
Sarituak izan dira honako hauek: Fagor Ederlan, produktu zirkularrenaren kategorian, portamanguetas STA produktuagatik; Somos Oreka, zerbitzu zirkularrenaren saria, elikagaien soberakinak emateko eta berriz aprobetxatzeko zerbitzua emateko plataformagatik; Gamesa Gearbox, negozio-eredu zirkularraren kategorian, produktuen fabrikazio soiletik aerosorgailuetako piezen birmanufakturan oinarritutako negozio-eredu batera eboluzionatzeagatik; eta Fuelium enpresa, startup zirkularrenaren kategorian, paperezko bateriengatik.
Epaimahaiak kontuan hartu dituen irizpideak honako hauek izan dira: zirkulartasun gradua, bideragarritasuna, kapazitatea, eskalagarritasuna, ingurumenari egiten zaion ekarpena, eta eraldaketarako potentziala.
Ihobeko zuzendari nagusi Botok sarien garrantzia azpimarratu du: "Sari hauek katalizatzaile bat dira enpresa gehiago jardunbide jasangarriak hartzera bultzatzeko, lurraldeko ekonomia eraldatu dezakeen efektu biderkatzaile bat sortuz", adierazi du Botok.
Portamanguetas STA produktua
Ibilgailuaren "segurtasunerako funtsezkoa" den portamanguetas STA produktuagatik saritu dute Fagor Ederlan. Hiru sistema bateratzen ditu horrek: direkzioa, moteltzea eta balaztaketa. Portamanguetas deritzanak "nabarmen murrizten du karbono-aztarna", birziklapen "estandar handiak" aplikatzen direlako. Epaimahaiak haren aluminiozko "diseinu berritzailea" hartu du kontuan, eta, halaber, lehengaiaren % 80 sekundarioa dela eta pisua % 51 txikiagoa dela.