Hilaren 20a "ezkerreko militante abertzale eta subiranistak biltzeko" unea izango dela azpimarratu du Debagoieneko EH Bilduk, horretarako bide emango duela Iruñean egingo den Aberri Egunak, "eta libre bizi nahi duen nazio bat garela aldarrikatzekoa". Haren hitzetan, "egoera politiko berezian" ospatuko da aurtengoa, "nazioarteko egoera nahaspilatuak baldintzatuta" egongo delako: "Gero eta gehiago direnean eskalada militarraz edo gerraz hitz egiten dutenak, Aberri Egunean Euskal Herria sustrai bakezale sakonak dituen nazioa dela aldarrikatuko da". Eta, hala, hara joateko autobusak antolatu dituzte bailaratik, "Euskal Herri osoko herritar subiranista, independentista, abertzale eta ezkertiarren komunitatea berriro biltzeko".
Joan-etorria egingo du autobusak, eta 10 eurokoa da prezioa. Izena emateko, berriz, herriz herri zehaztu dituzte lekuak: Antzuolan, Aitz Garbi tabernan; Aretxabaletan, Urbaltzen; Arrasaten, Iratin eta Taupan; Bergaran, Arranon eta Pol-Polen; Eskoriatzan, Inkernun; eta Oñatin, Arranon.
Egun osoko egitaraua
12:00etan izango da manifestazioa Iruñean, Golem zinemetatik abiatuta, eta ekitaldi politikoak emango dio amaiera; ondoren, aisialdi-eskaintza izango da. Hain zuzen, 13:15ean kaleko animazioa hasiko da, hala nola trikitilariekin, gaiteroekin, erraldoiekin, txarangarekin eta dantzariekin, baina Gaztelupeko plaza izango da jaiaren erdigunea: Izaki Gardenak, Belako eta Trikidantz musika taldeen kontzertuak izango dira, 16:00etan hasita. Horrez gain, Burgoen plazan izango da haurren gunea, jolasekin eta Ai, Zapotxin! Baratxuri zoparen sekretua kale antzerkiarekin.
