Master Cup txapelketako elite mailako finalerako txartel bila hiru debagoiendarrek jardun zuten atzo, Ladioko Areta pilotalekuan: Arrate Bergara bergararrak eta Uxue Oses eta Madalen Etxegarai oñatiarrek. Esku pilotan historia egiten dabilen Arrizabalaga gernikarrak eta sendo jardun zuen Bergarak eskuratu zuten txartela. Finala irabaziz gero seigarren binakako txapelketa izango du Arrizabalagak. Aurrean, baina Mirian Arraiza eta Enara Gaminde izango dituzte, oso kontuan hartzeko bikotea; hain zuzen ere, 2022ko txapelketan elkarrekin jantzi zuten txapela Arrizabalagak eta Gamindek, oraingoan aurkari izango direnek.
Insausti eta Betegi ere finalean
Egun osoko pilota festa bizi izan zuten atzo Areta pilotalekuan; goizean lepo bete ziren harmailak elite mailako partiduak ikusteko, eta arratsaldean ere pilotazaleek ez zuten hutsik egin gainontzeko maila guztietako finalerdiak gertutik jarraitzeko. Promesen mailan, eskuz binaka pilota mistoan, Olatz Insausti antzuolarrak eta Irati Betegi aretxabaletarrak Lopez de Okariz eta Perez izan zituzten aurrean; baita mendean hartu ere 13 eta 18. Finala Alize Sagardui eta Nahia Bertizen aurka jokatuko dute, hauek ere apirilaren 6an, Oiartzunen.