Debagoieneko Mankomunitateak, Garapen Agentzien Euskal Elkartearen bidez, Hazilan+ programa aurkeztu du, "kualifikazio maila ertain-altua izan arren, lan-merkatuan sartzeko edo berriro sartzeko zailtasunak dituzten langabeen laneratzea lortzeko eta enplegagarritasuna hobetzeko" asmoz. Hori dela eta, hainbat orientazio-ekintza jarriko ditu parte-hartzaileen eskura: "Zeharkako gaitasunen trebatzea, ezagutzen eguneraketa eta enpresako praktikak, besteak beste".
Programa "langabezian dauden pertsona kualifikatuei" dago zuzenduta, baina sustatzaileek adierazi dute "arreta berezia" jartzen dutela "geldialdi baten ondoren lan-merkatura itzuli nahi duten emakumeengan, kasu gehienetan zainketa lanetan egon direlako". Horrez gain, azpimarratu du parte-hartzaileek "beren beharren eta ezaugarrien araberako laguntza pertsonalizatua" jasoko dutela: "Lan-merkatuan eskatzen diren gaitasun pertsonalak eta profesionalak lortu ahal izango dituzte 80 orduko talde tailerren bidez. Ibilbide hori enpresan praktika bekadunak eginez osatzen da, parte-hartzaileek benetako lan-esperientzia izan dezaten".
Izen-ematea zabalik
Urtean bi edizio egingo dira Debagoienean, eta martxoaren 24an hasiko da lehena; hala, 14ra arte dago izena emateko aukera. Horretarako, halere, hiru baldintza bete behar dira: Debagoieneko herriren batean erroldatuta egon behar da, baita langabezia ere, eta erdi edo goi-mailako Lanbide Heziketako zikloa, unibertsitate-gradua edo unibertsitate-ondokoa amaituta izan behar da. Hiru puntu horiek betez gero, bi bide daude aurkezteko: aurrez aurre, Mankomunitateak Arrasaten duen egoitzan, 09:00etatik 14:00etara, edo webgunean, erregistro elektronikoa erabiliz.
Hemen eskaera orria eta izen emateari buruzko informazioa.
