Beñat Arizabaletak aurkeztuta, Debagoieneko Kantari saio gehiago grabatuko dituzte bihar, domeka. Aretxabaletako Kurtzebarri eta Eskoriatzako Luis Ezeiza ikastetxeetako eta Arizmendi Ikastolako Almen guneko 7 eta 12 urte bitarteko ikasleak izango dira oraingoan protagonista.
Bost saio grabatuko dituzte guztira, 16:00etan hasi eta 20:00ak bitartean. Sarrera doakoa da eta guztiontzako daude grabazioak bertatik bertara ikusteko ateak zabalik.
Bergarako saioak ikusgai
Urtarrilean grabatu zituzten Bergarako Seminarixoan denboraldiko estreinako saioak, Bergarako, Antzuolako eta Elgetako artista gazteak gonbidatuta. Saio horiek Goiena telebistan eskaintzen hasita daude; gaur, zapatua, 16:00ean eta 20:30ean, eta domekan, 10:00etan, 14:30ean eta 18:30ean emango dute bigarren saioa.
