Seaskak eta Badok plataformak Musika Maketa Lehiaketaren bigarren edizioa antolatu dute. Guztira, 29 talde aurkeztu ziren lehiaketara eta epaimahaiak hala erabakita sei talde pasatu dira azken fasera, tartean Debagoieneko bi talde: Antzuola eta Hernaniko Karena eta Oñatiko Malko. Hauekin batera Diraki, Kuma No Motor, Lurhats eta Hartzak Zeruan taldeak lehiatuko dira. Musika Maketa Lehiaketaren saria Herri Urratsen kontzertua jotzea da.
Aurreko urteko edizioarekin alderatuta, berritasun bat gehitu dute antolatzaileek, publikoaren botoa. Epaimahaiaren balorazioaz gain, publikoak bere iritzia emateko aukera izango du, eta bi faktore hauek kontuan hartuta erabakiko da azken irabazlea. Badok plataformaren atarian eman daiteke botoa, gaurtik otsailaren 23ra bitarte. Irabazlea martxoaren hasieran iragarriko dute.
