UDAko koordinatzaileak fin aritu dira goizean txapelketako lehenengo partiduak antolatzen, eta eguraldia lagun, giro polita izan dute Ibarran. Berdegunea bitan zatituta, eta futbol zelai txikia berotze ariketak egiteko aprobetxatuta, arazo barik antolatu ahal izan dituzte norgehiagokak. "Ia 600 neska-mutiko batuko dira txapelketan, gehienak Debagoieneko taldetakoak. 2014ko 160 neska-mutiko inguru izango ditugu, 2015eko 220 eta 2016ko beste 180 jokalari", adierazi dute UDAko antolaketa taldeko lagunek.
Txapelketa gaur hasi dute, hilak 26, eta bihar eta etzi ere partiduak jokatuko dituzte. Hala, txapelketako irabazleak ezagutzeko norgehiagoka erabakigarriak abenduaren 28an jokatuko dituzte.
