Debagoieneko EAJk, ohar bidez azaldu duenez, "funtsezkoak" diren bi proposamen egin ditu Mankomunitatearen 2025eko aurrekontua "hobetzeko" asmoz: batetik, proposatu du 50.000 euro bideratzea "gizarte-zerbitzuen mapa garatzeko", nabarmenduta aurreko legealdian zehaztu zela era horretako mapa bat baina ordutik ez dela hori ezartzeko neurririk hartu; bestetik, beste 50.000 euro bideratu nahi ditu "hondakinen bilketen birziklapena areagotzeko eskualdeko kanpaina" bat garatzera, "azken aldiko datuek erakusten baitute eskualdeko hondakinen bereizketa-indizeek behera egin dutela".
Hain zuzen ere, jeltzaleek adierazi dutenez, gaur eztabaidatuko da Gobernu Batzordean aurrekontu proposamena, eta beharrezkotzat jotzen dute euren bi puntuak txertatzea: "Bailararen garapenerako funtsezko bi erronkari heltzen diete: batetik, gizarte zerbitzuak hobetzea, eta bestetik birziklapena areagotuz ingurumen jasangarritasuna bultzatzea". Are gehiago, erantsi dute EH Bilduri "eskua luzatzeko" prest daudela, "hitz egiteko, adosteko, eskualde hobera eraikitzeko, zerbitzu hobeekin".
