Sute batek Donamartiriko (Nafarroa Beherea) Arberoa ikastolako hiru eraikinetako zaharrena erre zuen urriaren 28an, "kalte handiak" eraginez bulegoetan eta ikasgela batzuetan; hala, hari babesa emateko asmoz, ekintzak egingo ditu Arizmendik, "ikastola bat ixteak, euskarak eta Euskal Herriak bizi irauteko eta garatzeko irla bat galtzea suposatzen duelako".
Arrasaten, Aretxabaletan eta Eskoriatzan egingo dituzte ekintzak, Sua itxungi, elkartasuna ixotu lelopean, 17:00etatik aurrera. Txistorra eta edariak salduko dituzte hiru herrietan, eta zozketak ere ez dira faltako: Aretxabaletan, Mitarte kalean izango da; Arrasaten, Arimazubi plazan, San Andresen, Biteri plazan eta San Isidro ermitaren ondoan; eta Eskoriatzan, Herriko Plazan.
